ليش انا شخصياً، حظي من السما لأنو بعشق اليسا وصوت اليسا؟
لأنو اليسا وصوت اليسا قادرين من اول طلة، نوتة، ايقاع، آآآآه، يحملوني انا وغيري كتار لسابع سما، يغيّرولي الموود، يعطوني جرعة فرح وطاقة ايجابية، اقوى مليون مرة من حبة بروزاك.
اخر همّي، اذا في اصوات اقوى، صوت اليسا بالنسبة الي انا شخصيا ( وهيدا الاهم) هو الاقوى، الأحلى، الأهمّ، الاحنّ، الاصدق بنقل كل المشاعر اللي ممكن حسّا وامرق فيها. وحدا اليسا وصوت اليسا بخلوني عبالي اعشق وانغرم وجنّ واتمايل عال beat, واوقع وارجع اوقف، وازعل وارجع اضحك، ولما الدنيا تبوظ ، بقرر ما بزعل ولا اضرب بوز، لأني عايشة حالة حب وايمان مع هالاغنيات اللي بترافقني وبترافق كتير غيري بكل الاوقات والظروف والحالات، بالفرح والزعل، بالعشق والوجع، بالانتصار والانكسار، بالوحدة والعجقة، بالاختناق والاوكسيجين. مع اليسا وصوت اليسا واغنيات اليسا، انا وغيري كتااار حنضل نغني كمان وكمان، ونرقص عالاحزان. وبدكن أكتر من هيك؟ اليسا وصوت اليسا بالنسبة الي انا شخصيا اصدق صورة عن لبنان.
لبنان الام والبيّ اللي منحبن حتى لو ما كانوا الاهل المثاليين. لبنان الابيض متل التلج بقلبو، الاخضر ( مع انو اليسا من دير الاحمر)، الاصيل الشجاع ، الجريء، الحنون ، الطيب العاطفي ،الانساني ،الحر ، المنفتح المثقف ، السابق عصره قد ما حاولوا يرجعوه لورا، اللي ما بيستسلم قد ما اكل كفوف ، اللي بيرجع يوقف واقوى من الاول بعد كل ضربة وخيانة وغدر ومصيبة، اللي بيتحدى الموت بعشقه للحياة. اللي ما بيهمه حدا يتنمّر عليه، لأنو هو لبنان، وغيرو مييين؟ غيرو شووو؟
صوت اليسا هو الحقيقة بعالم كلو وهم، واللي مش ع زوقه هالحكي, it’s okkkk, فيه يسمع ويحب ويعشق اي صوت تاني، ويعيش بأي وطن تاني، كوكبنا الفني مليان اوطان، و الوطن انتماء، وانا انتمي الى صوت اليسا، وحظي من السما، لأنو صوت اليسا، بالنسبة الي انا شخصيا، متل لبنان، قطعة من السما.